[you][you]

مشاركتي بسيطة وأتمنى توصل لقلوب كل من في المنتدى جميعا ليش أشوف المثالية طاغية على أغلب المشاركات وفي بعض الردود وين البساطة إللي يقرأ بعض المشاركات يقول أكيد صاحب هالمشاركة مطبق هالكلام على نفسه كأنه ملاك نازل من السما ليش المثالية ليش مايكون كل واحد على سجيته على طبعه أنا ما أعرفك ولا أنت تعرفني الأغلبية مسجلين ألقاب بدون أسماء لما أنا أجي أطرح موضوع أو خاطرة أو حوار ليش نكون بعيدين عن الواقع أنا وأنت بشر يمكن أنت جارح حبيب لك أو ساب قريب أو متكلم على بعيد جالس على المنتدى ترد وتضحك ووراك أنسان يبكي مجروح أو قريب مكروب ليش نركض ورى ناس يمكن ماهمتهم مشاعرنا وننسى ناس تحبنا وياما ضحوا لأجلنا كثييير إحنا مو ملائكة إحنا بشر والله بشر ويمكن بلحظة وحدة نخسر الناس إللي حبونا وساعتها ماراح ينفعنا شيء لأننا مانحس بقيمة الشخص إلا بعد فقده خلونا نراجع أنفسنا ليه القسوة ليه القطيعة؟؟


أنا قصتي طويلة مابي منكم تحلونها ولا أبي تتأثرون وتبكون لا أنا أبي كل واحد يراجع نفسه يمكن مقصر مع حبيب له
حبتني وحبيتها كانت ملاك بجمالها برقتها بطيبة قلبها بحنانها بأخلاقها حتى بزعلها عمري ماشفت هالأشياء تجتمع بإنسانة كنت أشوفها وأبتسم غصب عني عطتني الحب والحنان والوفاااااء والأخلاص عطتني أشياء كثيرة كنت عاطل بدون عمل كانت طالبة بالكلية أول ما تستلم مكافأتها على طول تعطيني بدون ماتاخذ منها ولا ريال كانت تحرم نفسها من أشياء مو كمالية بالعكس إلا ضرورية كانت تضحي علشاني كثير تعطيني ولا تنتظر مني مقابل من حبها لي تحملتني واجد فضلتني على نفسها ومهما قلت ماقدر أحصر فعايلها أنا بهالحب اللي لقيته منها حسيت بلحظة إني ملكتها وحطيت ببالي مهما سويت فيها بترد وترجع زي أول لأنها تحبني نسيت حبي لها وإني بدونها ولا شي كانت أحيانا تحصل بينا خلافات أنا من النوع اذا زعلت أجرح بدون ما أحس أبد كان جرحي لها سهوم تنغرز بقلبها الطاهر كانت تبكي من قلب كنت أندم وأعتذر وأنسى وأرجع وأجرح كنت أقول فكيني شرك أبعدي عني خليني فحالي صجيتيني كان خوفها علي وأهتمامها فيني كبير ساعدتني تركت الدخان وتركت القات شجعتني ووقفت معاي وأنا أجرح وأقول عطيتك وجه بزيادة نسيت إن عندها قلب كنت أزعل من أتفه الأسباب وألاقيها تعتذر وتترجاني أسامحها مع إني الغلطان نسيت شي أسمه (آسف) لأني عارف حتى لوإني أنا الغلطان هي إللي تعتذر وتهدي الوضع وتحمل نفسها الغلط زيادة كنت أغرز بقلبها سهام وأشواك بجروحي وعدم أهتمامي فيها كنت أشوف الحزن بصوتها وعيونها أسألها وتقول مشتاقة لك وأحبك والحقيقة إنها تعيش معاناة بسبب جرحي لها كنت ألزم عليها تقول تجلس ساعتين حتى تقدر تتكلم من دموعها وآخر شي تقول سامحني كدرت عليك وضايقتك وأنا إللي كدرت عليها وحزنتها كانت بشهامتها وكرمها ونخوتها ولا مية رجال وقفت معاي وقفات والله رجولية بعد كذا سنتين من حبنا توظفت وظيفة بسيطة براتب ألف ماكانت الوظيفة عاجبتني بس هي كانت فرحانة وتشجعني أصبر وأستمر ولا أستعجل ومع كذا ماتغيرت علي كل ماتجيها المكافأة تحلف علي وتعطيني كنت أشوفها تذبل قدامي أحسها تعبانة أسألها وتقول خوف عليك وهم الكلية كانت طوال الليل تبكي بسببي وأنا نايم أو سهران مع خوياي ولا دريت عنها من زود الجراح إللي بقلبها أغمي عليها ودوها أهلها المستشفى والدكتور يقول هذا تعب نفسي ودايم تكتم بقلبها ماكنت أدري عن شي خبت عني تعبها فكرت في مشاعري وأنا نسيت مشاعرها كنت أشوف حبها وأهتمامها الزايد ضعف شخصية صرت أفكر أتركها تهورت مرة وقلت لها وش رايك نترك بعض ماكانت أول مرة أقولها لها بس ذيك المرة ماعاد تحملت جلست تصيح بالجوال وأغمي عليها من يومها ما أعرف عنها شي ودوها المستشفى وقال الدكتور عندها القلب صار تعبان وماعاد يتحمل أزمات زيادة رجعت البيت وقفلت على نفسها غرفتها يادوب تاكل لقمة باليوم تركت الكلية وكانت الأولى على دفعتها هذا إللي عرفته من أخوها فقدتها وعرفت حقارتي وإني ولا شي بدونها آخر رسالة جتني منها قبل 6 شهور تقول هذا قلبي حط إيدك عليه راح تحصله سهام وأشواك من جروحك ياقسوة قلبك ياحبيبي ومن لحظتها ماعاد أعرف عنها شي تركت الوظيفة رجعت أدخن كل ليلة أروح عند بيتها أطالع فيه أتذكر أيامنا أتحسر على كل ثانية من حياتي أنشغلت فيها عنها صرت أحس بإحساسها أبكي من شدة ما أحس بقلبي فقدتها كثيييير عرفت إني ما أستاهلها ولا أستاهل حبها ووفائها والله لوترجع لي لأقبل الأرض إللي تمشي عليها أحس حياتي أنتهت فرطت بكنز لولفيت الدنيا ما أحصل مثله أسأل أخوها عنها ويقول ماتتكلم أبد طول الوقت ساكته أتذكر ضحكتها أبتسامتها حنانها خوفها لهفتها كل هذا ماعرفته إلا لما فقدتها المرأة تتحمل تتحمل تتحمل جروح حبيبها لكن يجي اليوم إللي قلبها الصغير يتعب هذا القلب إللي أهدته لحبيبها وأرخصت له حياتها فعلا لاتلومها إذا حبت وفت وضحت لاتقول ضعيفة يكفيها قوة تحملت جرحك لها وصدودك وأنشغالك عنها ما شكت لك ولا جرحتك بكلمة لكل من عنده حبيب تخيل تكون السبب بعذاب إنسانة حبتك مو عذابها وبس إلا عذابها وجرحها ومرضها ودمار مستقبلها نصيحة من إنسان جرب ويذوق مرارة فراق حبيبته إللي قسى عليها كل واحد يراجع نفسه قبل فوات الأوان
أخوكم : أسير الغرام

أتمنى يوصل كلامي لقلوبكم قبل مسامعكم وتأخذوني عبرة لكم..