سنين فرقاك هدت حيل صاحبها
لين انثنى للهموم وقلة الحيله
كن الليالي دهورن يوم احسبها
وكني مع الوقت ينصب لي محابيله
قضى بي البعد واقصى في مضاربها
خلى الأماني قتيله في معاقيله
حكم بي الياس وانهى حال طالبها
حتى جثى واحدن واقف على حيله
ماتت حلوم الفرح قدام اداعبها
وطيف السعادة تبدد قبل اراعيله
مدري تباشير وقتي وين غايبها
اتهل ليل التلاقي من مقابيله
يظهر على الوجه بسمه عقب حاربها
ويطلق حجاج الوناسه من تهاليله
ويبعد عن النفس ضيقات تقالبها
ويشيل بالي عن الهوجاس دربيله
تقبل ليال الزمن تضحك حواجبها
ويروض فكري عن السجات واثنيله
دوري يالايام هاتي من غرايبها
ثم ولعي نور دربي من قناديله
اروي عيونن جفاف الهجر شاهبها
وبلي عروق المواصل من مناهيله