حبيبي لاتقول اني نسيت ولانويت فراق
مقرك في سواد عيوني اللي دوم سهرانه
حبيبي طيفك يزاهي الصبح بالنور والاشراق
ويجلا بنوره الليل وتشاعق فيه ضيَّانه
حبيبي لك مكان بخافقي وتزيِّنه الاشواق
ولاغيرك سكن قلبي جرى في وسط شريانه
حبيبي ماحدٍ غيرك تمنيته على الاطلاق
ولاقبلك عطيت احد ٍ كلام السر وآمانه
حبيبي لاانحرم من شوفتك فرقاك ماتنطاق
عسى الله يحرم اللي منك يحرمني من اخوانه
حبيبي ان كان قلبك مثل قلبي مهتوي مشتاق
فعطني ضحكتك عندي لها معنى وفتَّانه
حبيبي وش تبي غير القسم ياقمة الأخلاق
حبيبي أقسم بربي ورب الخلق سبحانه
حبيبي أقسم انك داخلي وتعيش بالأعماق
حبيبي أنت مثل الروح وانت الماس والدانه
حبيبي لو تجمَّع كل احاسيس وهوى العشَّاق
وتوزن ماسوت حبي ولامالت بميزانه
حبيبي لاتقول اني أبالغ في الهوى منساق
ومسموح ٍ تقول اللي بقلبه قاله لسانه
حبيبي أنت مثل صبيِّ عيني بيننا ميثاق
ولابعتك ومنهو اللي يبيع وينكر اوطانه
حبيبي أنت مثل الروح ويشهد ربي الخلاَّق
فلااغلي مثلك احدٍ في الخلايق انسه وجانه
حبيبي لامن احيا وخالت المزن وبرق برَّاق
أحس انك لفيت يفز قلبي وتجلي احزانه
حبيبي لو نويت البعد فاذكر دمعي الرقراق
أنا مااقوى الفراق ولا احتمل فرقاك واشجانه
حبيبي اصخف ان عندك صخف أو رحمه أو اشفاق
ومثلك مايليق ابه القسا بربعه وخلانه
حبيبي احفظ العهد اذكر انك معطي الميثاق
ومن يعطي عهود فلزم يوفي يبر بايمانه
حبيبي أنت آخر ساحل ومينا ومرسى ً لاق
أبطوي شراع مركب حبي وبرسي بشطّانه