لا تنشغل فيني انا بحالي ادرى
قلب(ن)تعلق فيك ينسى مع الوقت
اكثر من اللي صارلي ويش يجرى
بين الــرجا والياس شفني تعـلقت
هاك القصايد لاتضايقت وقـــرى
شف وش كثرفيها لضحكاتك اشتقت
يامشتهي فرقا المواليف حـذرى
تبعد وانا من سكرة الحب مـافقت
لاطافت الفرصه تحريت الاخرى
وتروح ماكنــــي عليها تشـوقت
اثر الوفا ينباع عندك ويشـرى
ماكنت اصدق فيه واليوم صدقت
ساري لو ان الليل مافيه قمرى
اشيل من حمل الهوى فوق ماطقت
لاصار حظ اقشر والايام قشـــرى
مافيه احد عاقل يلومك اليا ضقت
صحيح بعض الناس فرقاه بشرى
وبعض البشرلاغاب ليله تضايقت
ليتك خذيت بليل الافكار مسـرى
غربت من كثر الطـواري وشرقت
السيل يبقى له من القاع مجـرى
ويبقى لـك التذكارلوكنت فـارقت
اشوفلك من وين مارحت ذكـرى
لاشفتها صــــديت عنها ودنـقت
ماكل جرح لاخذا ايام يبــــرى
بعض الجروح يزيد شره مع الـوقت