ياوسيع البال ضيقت الصدور
رحت ماعلمتني وين انت ساري
في غيابك مالخلق الله حضور
وفي حضورك مالهم بالبال طاري
ليه ماتختال يابدر البدور
والقصايد لك وصيفات وجواري
لك بنات الفكر ربات الخدور
يكشفن الثامهن والجرح عاري
جعل قلب ماملاه الصدق نور
عن وجه الريح مايلقى مذاري
التغاضي عجز لاطال القصور
ليه اداري وانت عني منت داري
الزمان قصير والدنيا تدور
كل يوم يضيق في عيني مداري
صاحبي محتاج لك شعر وشعور
واحتياجي شي ماكان اختياري
من متى والغصن يختار الطيور
من متى والبال يختار الطواري
لاتسمي صمتي البارح غرور
انكساري خلف هالصمت امتواري
في غياب الشمس وش ذنب الزهور
والمطر لاشح وش ذنب الصحاري
اللقاء لحظات والغيبه شهور
تقصر الخطوات ويطول انتظاري
لو قريت المنكتب بين السطور
ماكنت لغلطه العمر اعتذاري
صمت هالمينا مثل صمت القبور
مارسى مركب ولا لاحت صواري
مما راق لي،،،
زمان الصمت،،،