رفعت كفي .. ماقدرت ارفـع الصـوت
لـو كـان فالخاطــر .. كـلام ٍ كتمـتـه
لحظـه وداع / وكنهـا سـكـرة المــوت
ضاع الطريق .. اللي من اول رسمتـه
ضاع الطريق وصرت في الدرب مبهوت
مــدري وش اللي فاتنـي مـا اغتنمـتـه !
العمر مرّ .. وراح مع فايـت الفـوت
صحيح ضعت .. وضاع حلـم ٍ حلمتـه
الا انت ياللي قربـك لروحـي القـوت
لو غبت / يبقى وسمك اللـي وسمتـه
يبقى كما نقش ٍ على الصخر منحـوت
حفظتــه .. بشـكلـه ولونــه وسـمتّـه
مهما الفراق اوجـاع والبعــد ممقـوت
اصبح مصير ٍ من غـلاك / احترمتـه
دمع النصر لو طاح من ( عين جالوت )
( عـين العقـل ) دمـع ٍ تكنّــه / حشمتـه
ذخرت لك يافرحـة العمـر .. تابـوت
فيــه الغــرام اللـي بديتــه / ختمـتـه
يبقى الغصن لو مابقى فالغصـن تـوت
تحـرك انســام الذعـاذيــع .. صمتــه
سكّت .. وانا مـن موادعـك مكبـوت
شـي ٍ تجاهـلـتــه .. وشـي ٍ فهمتـه !
حبل الرجاء من جور الايـام مفلـوت
ياليت قلبـي عـن غرامـك عصمتـه
ياما .. بنيت بيـوت وبيـوت وبيـوت
اليوم .. كـم بيـت ٍ بنيتـه .. هدمتـه