جيت الطبيب اللي على الصدر مختص
.. .. ابي اسوي لي على الصدر تشخيص


ثم حط سماعه على الصدر قال اص
.. .. اسمع لي بصدرك حساس و وصاويص



نيى نسوي لك اشاعه ونفحص
.. .. ونمحص اللي داخل الصدر تمحيص



سوى الاشاعه قال ياصاحبي بص
.. .. لا يدخل صدرك احد دون ترخيص



لقيت في صدرك مواطي قدم لص
.. .. والقلب مقصوص من الصدر تقصيص



وانته عن اللي سارق قلبك ابخص
.. .. قلت ايه داري به وعن وضعه ابخيص



هذاك مايرخص لو الناس ترخص
.. .. وانا بعد عنده ترى ماني رخيص



بيني وبينه قلبي النص بالنص
.. .. لا والله الا كله بدون تنقيص



يخبص ويوزع واقول امش ما اقص
.. .. مافيه تكويش ولا فيه تخبيص



مادام هذه علتي ياطبيب اص
.. .. ماني في حاجة علاج وتشخيص