لا تسأليني ..
لا تسأليني ..
تعالي بجنب قلبي لا يشوفك عذول
واعطي خيالي دقيقة شعر لو يزعلك
يا مرحبا بك ودارك بين صمت وذهول
من قلبي اللي من اول في يدينك هلك
شفتي ذبول الملامح والوجع والنحول
لا تسأليني عن اسبابه انا بسألك
من عرفتك وحالي في غيابك يقول
مهما تباعد دروبي بوصلك بوصلك
اقسم بربي وانا اللي من عرفني زعول
ما مل قلبي وقوفه بين منك ولك
غمضت عيني وشفتك تحت جفني جفول
والحقت فكري ورى الاحلام يتخيلك
كل الهضاب الجميله والزهور والحقول
ردت معي يوم انادي يا ملك ياملك
واطلقت من قوس عنتر رمية ما تزول
ما صابت الا فؤاد بالعتب ظللك
واليوم جيتي قصيده حزن ذيك السهول
يا ما اصعبك لو يبين للغشيم اسهلك
وقفت باخرك خايف لا جديلك يطول
والله ربك وكني واقف باولك
يابنت نرجس فؤادي يالحجاج الخجول
يا ريشة في دفاها يستكين الفلك
يا حلوة بالخيال ومرة بالوصول
اكبر حرام بعيني والهوى حللك
في حبك اللي ذبحني ما عرفت الحلول
اعرفك والله ولكني كثير اجهلك
ادخل بجاهي عليك اذا لمحتي ذبول
لا تسأليني عن اسبابه انا بسألك
الحريصي..
|