صدفه بلا موعد عيون الشوق هلت بالدموع
هاجت بعد ذكرى قديمه مبطيه ماطريتها

والقلب مقطوع الرجاء ضيق على حدب الضلوع
والنفس من كثر البشر ضاقت وانا حديتها

كله سبايب واحد(ن) ماجابه الحظ القنوع
ياوجد حالي لادلجت روحي وجاني صيتها

ياكم وكم من ليلة اوقد على شاني شموع
من دمع عينه تحترق شمعه وانا طفيتها

واليوم اداري شمعتي لاتنتثر قدم الربوع
اخاف لانثرها على ناس (ن)ولا هميتها

نبض المحبه يرتفع له في نزول وفي طلوع
مير الوكاد ان المحبه بينه ماخفيتها

ياما انتظرته ماحسبت حساب شهر ولا سبوع
ذود المحبه في خفوقي راتعه ماهديتها

لابارك الله فيك ياعينن توارات بالدموع
ولابارك الله في عروش مابنت لي بيتها