يامواطن لا تعاني دام أبو متعب ملك
والله إنه لو درى عن حالتك ما جا قصور

لكن اللي تعرفـه مـثـل ما قـد قلت لك
البطانه البطانه لا افسدت كـل شــي يمور


يامواطن ادعي الله يرزقـك ويكمـلـك
وأجمع الميسور مما تقبضه باقـي الدهور

لا تديّـن لا تديّـن وأنـتـبـه مستقـبلـك
والله إن الديـن يهدم مابنيته مــن شهور

أدري وش عيب المواطن لكنني بسألك
وش يعيبك لوبتعمل عامل إنتاجٍ صبور..؟

مثل أي إنسان وافـد فـي بلـدنا دلّلك
يعمل ابجده وجهده وابشرف يبني قصور

لا تعاني م البطـالـه ما حـد ابيتحمّلـك
كان تفكيرك موظف إلك أوامروإلك شور

أعمل بورشة حداده وبشرف تخدم هلك
مايعيب الرجـل غير إن مد يده للحضور

لا تقول انا سعودي وكل خدمه توصلك
انا وانته وكل شاب توّنا ابعمر الـزهور

تقـدر ابخـدمـة بلـدك والبـلـد يسـتـاهلك
اي نعم نقدر نغـير بالتـكـاتـف كـل دور

ونقدر إنكمل بعضنا ولا أحد يستجهلك
وراح نشغل أي وظيفه ابكل فخرٍوابسرور

لكن الهمه صفر ماتـبـي شـي يشغـلـك
دام في من يخدمك عيش في جسمك ظمور

لا تعاني لا تعـانـي دام أبـو متـعـب ملك
والله إنه لودرى عن حالتك ماجا قصور..!