آه لو تدري وش سوى غيابك في غيابك
وآه لوتدري وش سويت لأجلك في غيابي
اشهد اني كنت افكر فيك واطرد في سرابك
لين صرت اشوف مشروب الحقيقه في سرابي
كني اقرأ لاذكرتك في كتابك في كتابك
واثرني اقراك في صفحة ثمينه من كتابي
ادري اني اعشقك واهواك واتمنى عتابك
وادري اني ما اقدر اسمعك كلمه من عتابي
صدقني ما اشتكي منك لو احيا في عذابك
ولو قسيت يالحبيب ما اشتكي لك من عذابي
كان فكرك في بحوري يانظر عيني غدا بك
اعلم علم اليقين ان الفكر يمك غدا بي
الهيام اللي طواك ويم محبوبك سرابك
اشهد انه قد طوى قلبي ويمك قد سرابي
هاجسي باشواق قلبي في سما فكري لفى بك
وليت مهجوسك بذكري في سما فكرك لفى بي
لو لفيتني بارحب ياهلا بك ياهلا بك
وليتني اسمع تراحيبك وقولك ياهلا بي
جيت لك باشواق قلبي عاني ودقيت بابك
وانتظر شوقك يجيني عاني ويدق بابي
ودي آخذ كاس شهدك صافي واشرب شرابك
وياعساي اسقيك كاس الشهد من صافي شرابي
الف مره لجل عينك في الهوى احسب حسابك
والله اعلم انك انت حاسب(ن) مثلي حسابي