البارحه طول ليلي ماغفت عيني
ماذاقت النوم والهوجاس يكويها
ماهو سهر واحدٍ بلشان بالديني
سهران للي غلاها الروح محييها
لاجيت ابغفى طرت لي ماتخليني
أشوفها ضايقه والدمع غاشيها
ريميةٍ حبها متمكنٍ فيني
الله عطها غلا ماحد يساويها
قلبي وعقلي وروحي وأول سنيني
نصيبها ياعسى عيني تراعيها
كم عام أقفى وانا ربي معنيني
تقول لي صد عني وأرجع أشريها
وأقول وش هالعناد شلون تقويني
وترد لي ذي حياتي ذي مباديها
أبيك تثبت إذا بالصدق هاويني
وإلا إنت روحك هبوب الريح يغريها
ماتدري إن العشق نبعه شراييني
وإنا بروحي وعمري كلي أفديها
هذا دليلي لها إن كان تبغيني
بأول سنه وسنتين وخمس نطويها
وأنا على حالتي وأقول يمديني
الحق مدا غاية المزيون وأرضيها
خليتها بالقصايد هي عناويني
ومن باقة الحب والأشواق مهديها
وأمد كفي لها وأقول يازيني
عطني يمينك ترى يمناي تبغيها
شاري همومك وجرحك جرح يعنيني
وش عاد تبي أكثر من إثبات معطيها
الين جتني مساء البارح تناديني
تقول لي يافهد هالناس وش فيها
كل جفاني وجرحي صار يعييني
حتى أقرب الناس ولاكني أعنيها
وتقول لي يافهد تعال مابيني
خذني لدنياك ذوقني حلاويها
قلبي يبيها وعقلي رد رجليني
ويقول لي رد قلبك لايخاويها
بأذكرك وينها يوم إنت مشقيني
هالحين جاتك يوم إن الوقت مشقيها
أحترت مدري هل أنتي صدق تغليني
وإلا زمانك هو الي جاب خافيها
ابي انشدك ليه لا ضقتي نصيتيني
ودنياك وقت السعه وشلون تقضيها
هذاء سؤالي رجاءً فيه ارضيني
وإن كان فيها مجال انا أعديها