ليه تتضايق ؟! دام هالدنيا عروس
تتمتّع بها .. من ورى فستانها

في بحرها بالزهد تطفو النفوس
ومن هو يقدّسها سكن قيعانها


قنوع : من لا طاح في عشق الفلوس
ومريض : من عاش ( العمر ) من شانها

وجهك عبوس ليا غدى قلبك عبوس
لوحة .. بتتشكّل حسب فنّانها


أحد يعيش بلا هدف عار ونكوس
وأحد عمل مع ناس زاد إيمانها

وأحد يطبّق .. كنّ في البلعوم موس
هو إمّعه خلف إمّعة شقرانها


والسهم ما ينفع إذا ما فيه قوس
والقوس وسهامك تبي نيشانها

والحلم ب( إرادة ) براضيها تدوس
وبإصرارك أنت بتمتلك بستانها


الشعر عذب ماهو كتابة طقوس
بسّط ونوّر دنيتك وأركانها

كريمة الدنيا بتعليم الدروس
وجميلة أكثر باختلاف ألوانها


الإنسان متميّز بعقل فالرؤوس
مدري متى تعمل بحين آوانها

والصدر : قلب فيه سكّين مغروس
والقلب يشكي جور من جيرانها


حياتك مراية وداخلك معكوس
مضمونها أهمّ من عنوانها

وأنت ؟ تتضايق والغلا ملء الكؤوس
في قلب صان وصورتك به صانها


تشك فيني وآنا بالسجن محبوس
ببقى .. لو سجونك بلا قضبانها

باقي لك ومعك أحفل بعيد الجلوس
في قعر عيني وأوهبك تيجانها


مجنون قربك وبمحبّتك مهووس
حتى القصايد بك تخل أوزانها

خل النجوس تعيش في حضن النجوس
وخلني بروحك وأسكن بوديانها


ما أبيك تتضايق ليا من هبّ كوس
لا بد وغيومك تصب هتّانها

مرّات تترك شي فيك أنت مغروس
لراحتك .. حتى تميل أفنانها

وأحيان تضطر تشلع فبعض الضروس
وتشيلها من عرقها ومكانها