وشوش الناس بتحكي حواديت كتيرة
بتحكي ماضي وحاضر ومستقبل
وشوش بتستخبى من ماضيها
ووشوش تتألم من حاضرها
وتتأمل مستقبلها باللي مبخيه ليهم
....
في بداية يومي ...لقيت عيون بتحكي وتشكي و عيون تانية بتضحك وفرحانة
ماحدش زي التاني في اللي بيحس بيه بس الغريب إن في حاجات بتجمع بينهم
وهي الضحكة الصافية أو بكاء مظلوم
....
فكرت لحظات... في كوني من أي مجموعة من الاتنين
ضحكتي تكون ضحكة طفل برئ إتولد لدنيا مايعرفش الجرح طريق ليها
أو بكائي يعلى للسما ودموعي فيضان من مطر غزير تفيض على بلدي فتهجر سكانها
منازلهم
....
احتار عقلي في التمييز ولكني وجدت نفسي من مجموعة ثالثة تحلم بحياة تغلفها فرحة
وتختزن في بعض أيامها من العام بعض الدموع لآلام تحلي طعم هذه الفرحة
....
غريبة وشوش الناس دايما بتخبي حاجات وتكشف حاجات
بتخبي ماضي اتجرح منه كتير
وتكشف عن حاضر عجيب بكل ما فيه
وتنتظر مستقبل محير بما يحويه
....