قل لـي وش اللـي غيـرك لاتكابـر
دام العتب في سلم الاحباب مسمـوح***قل لـي وش اللـي غيـرك لاتكابـر
اصبحت انا لك روح وانته لي جروح***وانا اندب الفرقى واجامـل وصابـر
الى متى اقبـل علـى البـاب واروح***احسب مسافاتـي واعـرف المعابـر
وانا الذي غنيت مـع ساجـع الـدوح***وعليت لك من فيض شعـري منابـر
احرص على عشقك واعلي به صروح***وجزيتني كني معـك شخـص عابـر
اجي وانا مجـروح واروح مجـروح***خابـر بنيـاتـك ولانــي بخـابـر
الجسم حـي وداخلـه قلـب مذبـوح***وكسرت رجلٍ مالقـى اليـوم جابـر
كانك تبينـي افضـح السـر وابـوح***والـوم دور الوقـت واقـول غابـر
حنا عرب والسر من دونـه الـروح***وصـدورنـا للهم مـثـل المقـابـر
مانخلف النيـه ولـو فيـه مصلـوح***والغـدر مالـه عنـدنـا أي دابــر
وان كان جايك من على الهرج مشفوح***اللي على النمـه لهـم شبـر شابـر
بعطيك علم وعادتـي ابعـد الشـوح***تـرا المظاهـر ماتعكـس المخابـر
بصبر ولو صدري على حبـك يفـوح***وابقى على الهقـوه كتـوم و مثابـر
عل الفرح فـي مقبـل ايامنـا يلـوح***وانسى الهمـوم اللـي عليـه تسابـر
وان كان همك تستمع لي وانـا انـوح***فانـا همومـي ماحوتهـا المحـابـر